റിസർവ് ബാങ്ക് ഓഫ് ഇന്ത്യ പേയ്ടിഎം പേയ്മെന്റ്സ് ബാങ്ക് ലിമിറ്റഡിനെ (PPBL) ഷെഡ്യൂൾഡ് ബാങ്കുകളുടെ ഔദ്യോഗിക പട്ടികയിൽ നിന്ന് ഔദ്യോഗികമായി ഒഴിവാക്കി. ആർബിഐ ആക്ട് 1934-ലെ രണ്ടാം ഷെഡ്യൂളിൽ നിന്നാണ് ബാങ്കിനെ ഇപ്പോൾ പുറത്താക്കിയിരിക്കുന്നത്. പേയ്ടിഎം ബാങ്കിന്റെ ബാങ്കിങ് ലൈസൻസ് റദ്ദാക്കിയതിനെ തുടർന്നാണ് കേന്ദ്ര ബാങ്കിന്റെ ഈ അന്തിമ നടപടി.
തുടർച്ചയായ നിയമലംഘനങ്ങളും നിക്ഷേപകരുടെ താൽപ്പര്യങ്ങൾക്ക് വിരുദ്ധമായ പ്രവർത്തനങ്ങളും ചൂണ്ടിക്കാണിച്ചാണ് ആർബിഐ നേരത്തെ പേയ്ടിഎം പേയ്മെന്റ്സ് ബാങ്കിന്റെ ലൈസൻസ് റദ്ദാക്കിയത്. ബാങ്കിന്റെ പ്രവർത്തനങ്ങളിൽ ഗുരുതരമായ സുതാര്യതക്കുറവ് കണ്ടെത്തിയതിനെ തുടർന്ന് യാതൊരുവിധ ബാങ്കിങ് ഇടപാടുകളോ മറ്റ് അനുബന്ധ ബിസിനസ്സുകളോ നടത്തരുതെന്ന് കേന്ദ്ര ബാങ്ക് കർശന നിർദ്ദേശം നൽകിയിരുന്നു. ഇതിന് പിന്നാലെയാണ് ഇപ്പോൾ ബാങ്കിങ് പദവി പൂർണ്ണമായി നഷ്ടപ്പെടുത്തുന്ന വിജ്ഞാപനം പുറത്തുവന്നിരിക്കുന്നത്.
ലൈസൻസ് റദ്ദാക്കിയതിന് പിന്നാലെ ഡൽഹി ഹൈക്കോടതി പേയ്ടിഎം പേയ്മെന്റ്സ് ബാങ്ക് പൂർണ്ണമായി ലിക്വിഡേറ്റ് ചെയ്യാനും ഉത്തരവിട്ടിരുന്നു. ബാങ്കിങ് റെഗുലേഷൻ ആക്ട്, കമ്പനീസ് ആക്ട് എന്നിവ പ്രകാരമാണ് കോടതി ഈ നടപടി സ്വീകരിച്ചത്. ബാങ്കിന്റെ ആസ്തികൾ കൈകാര്യം ചെയ്യുന്നതിനായി സ്റ്റേറ്റ് ബാങ്ക് ഓഫ് ഇന്ത്യയുടെ മുൻ ചീഫ് ജനറൽ മാനേജർ ഗിരികുമാർ എം നായരെ ഒഫീഷ്യൽ ലിക്വിഡേറ്ററായി കോടതി നിയമിക്കുകയും ചെയ്തിട്ടുണ്ട്.
ആർബിഐയുടെ ചീഫ് ജനറൽ മാനേജർ ബ്രിജ് രാജ് പുറപ്പെടുവിച്ച പുതിയ ഉത്തരവോടെ പേയ്ടിഎം ബാങ്കിന്റെ ബാങ്കിങ് മേഖലയിലെ അധ്യായത്തിന് പൂർണ്ണമായ വിരാമമായിരിക്കുകയാണ്. രാജ്യത്തെ പ്രമുഖ ഡിജിറ്റൽ പേയ്മെന്റ് ബ്രാൻഡുകളിലൊന്നായ പേയ്ടിഎമ്മിന് തങ്ങളുടെ ബാങ്കിങ് അനുബന്ധ സ്ഥാപനത്തിന് മേലുണ്ടായ ഈ കനത്ത തിരിച്ചടി ഡിജിറ്റൽ സാമ്പത്തിക മേഖലയിൽ വലിയ ചർച്ചകൾക്ക് വഴിവെച്ചിട്ടുണ്ട്. ഷെഡ്യൂൾഡ് ബാങ്ക് പട്ടികയിൽ നിന്ന് പുറത്തായതോടെ ബാങ്കിന് ഇനി റിസർവ് ബാങ്കിൽ നിന്നുള്ള യാതൊരുവിധ ആനുകൂല്യങ്ങൾക്കും അർഹതയുണ്ടായിരിക്കില്ല.
Content Highlights:RBI has removed Paytm Payments Bank Limited (PPBL) from the Second Schedule of the RBI Act, 1934.The move follows the cancellation of PPBL’s banking licence.RBI had earlier restricted the bank from undertaking banking and related business activities.